Тэлефон гарачай лініі:
+375 17 380-26-87
(панядзелак-пятніца з 9:00 да 12:00)

Спецыялісты Міністэрства ЖКГ тлумачаць, як уцяпліць дом, ці варта мяняць батарэі і ці можна зэканоміць на электрычнасці [выпуск 6]

Па нормах у кватэры – ад 18 да 25 градусаў цяпла

Час цяпер такі: хтосьці  скардзіцца на холад у кватэры, хтосьці – на спякоту. Хоць адчуванне «холадна» для кожнага – індывідуальна. Звычайна батарэі ўключаюць, калі цягам пяці дзён сярэднясутачная тэмпература на вуліцы не падымаецца вышэй за 8 градусаў. Менавіта за пяць дзён у сярэднім астывае будынак. Прычым цагляныя хаты астываюць павольней, чым панэльныя.

- Ацяпленне можа быць запушчана і раней. Рашэнне прымаюць мясцовыя ўлады. У гэтым годзе, напрыклад, не сталі чакаць пяць дзён: па прагнозах надвор'е меркавалася халоднае, у тым ліку і на выходныя. Я лічу, што зрабілі правільна, - кажа начальнік упраўлення жыллёвай гаспадаркі Міністэрства ЖКГ Андрэй Рамашка. - Зараз сістэмы ацяплення працуюць у рэжыме прагравання - створана камфортная тэмпература ў кватэрах. Вырабляецца наладка сістэмы аўтаматычнага рэгулявання, якая ў залежнасці ад тэмпературы на вуліцы альбо дае больш цяпла, альбо менш. Аднак, што самае важнае ў сістэме ацяплення - каб жыхары не заўважалі, ўключаны батарэі ці не. Павінна быць камфортна.

З 2007 года ў шматпавярхоўках пачалі ставіць прыборы групавога ўліку цеплавой энергіі, выдаткаванай на ацяпленне і гарачае водазабеспячэнне і сістэмы аўтаматычнага рэгулявання. З аднаго боку, гэта эканоміць паліўна-энергетычныя рэсурсы, з другога – дазваляе кантраляваць сістэму на адлегласці. Цяпер сантэхніку не трэба спускацца ў цеплавы вузел дома і ўручную рэгуляваць падачу цяпла – усё робіць аўтаматыка. Цяпер такія сістэмы стаяць у 98% шматкватэрных жылых дамоў, дзе больш за 20 кватэр.

- Калі такая сістэма ўстаноўлена і не працуе, мы разглядаем гэта як злачынства. Што хаваць, такія выпадкі бываюць. Імі займаецца Дэпартамент па энергаэфектыўнасці.

- Калі аб'яўляюць аб запуску ацяплення, то кажуць: у Мінску падключым батарэі за пяць дзён. Чаму нельга ўсіх ўключыць адразу?

- Нельга адкрыць адразу ўсе засаўкі і пусціць цяпло па ўсім жылфонду. Цеплакрыніца проста можа не справіцца, таму ўключэнне праходзіць паэтапна.

Людзі пачнуць ўцяпляць кватэры, калі ім гэта будзе выгадна

- Але нават пасля ўключэння ацяплення, цяпло не ва ўсіх. Кажуць, некаторыя жыхары сталі самі плаціць па 30 мільёнаў за ўцяпленне сваіх кватэр...

- 30 мільёнаў – гэта сярэдняя цана для вуглавога памяшкання, дзе дзве вонкавыя сцяны. Цяпер рынак гэтых паслуг вялікі. І працы можа выканаць не толькі ЖЭС. Па разліках спецыялістаў Сусветнага Банка, якія вывучалі ў нас праблему цеплавой мадэрнізацыі, квадратны метр уцяплення каштуе 97 даляраў. Гэта задорага. Нейкія арганізацыі робяць за 50 даляраў. Дзесьці чытаў, што людзі зрабілі ўцяпленне па 27 даляраў за квадратны метр. Розныя расцэнкі.

- Суседні з мною дом дакладна ўцяплёны: хто захацеў, той і заказаў гэтыя працы. Выглядае гэта не зусім эстэтычна. Ці няма тут парушэння? Бо змяніўся знешні выгляд дома.

- Вам, як уласніку жылога памяшкання, не забаронена мадэрнізаваць сваю асабістую маёмасць, калі гэта не парушае правоў і інтарэсаў іншых уласнікаў. І вы маеце поўнае права ўцяпліць кватэру. Папярэдне трэба ўзгадніць толькі колер з аддзелам архітэктуры адміністрацыі раёна.

- А грошы. Дакладней іх недахоп.

- У людзей павінна быць з аднаго боку магчымасць, з другога – стымул ўцяпляць жыллё. Мы цяпер спрабуем прыйсці да рашэння выдзяляць ільготныя крэдыты грамадзянам на выкананне энергаэфектыўных мерапрыемстваў. Стымул жа ўзнікне, калі людзям стане выгадна эканоміць цяпло.

- У якіх выпадках могуць бясплатна ўцяпліць кватэру?

- Калі ёсць прамярзанне канструкцыі з-за дэфекту канструктыўных элементаў. Напрыклад, пры будаўніцтве паставілі бракаваную панэль. ЖЭС праводзіць абследаванне і ставіць у план на ўцяпленне гэтую кватэру на наступны год.

Паставіш шклопакеты – з'явіцца цвіль?

- Вельмі многія цяпер ставяць шклопакеты. А хтосьці па-старому заляпляе вокны. Што лепш? Кажуць, калі паставіш «пластык», з'явіцца цвіль.

- Вокны – гэта лёгкія жылога памяшкання. І, калі мы ставім пластыкавыя вокны, то закрываем прытокава-выцяжную вентыляцыю, перашкаджаючы прытоку паветра. Мы гатуем ежу, прымаем душ - у кватэры ў любым выпадку з'яўляецца вільготнасць. Калі вентыляцыя не працуе, з'яўляецца волкасць, куты і сцены становяцца вільготнымі, з'яўляецца цвіль або грыбок. Зімой часта людзі сушаць бялізну ў памяшканні – гэта яшчэ больш спрыяе яе з'яўленню. Ёсць два выйсця. Першы - усталяваць прытокавыя клапаны. Другі і самы просты – праводзіць праветрыванне. Трэба двойчы ў дзень на пяць хвілін адкрываць усе вокны.

Ці патрэбныя ў нашых кватэрах батарэі з рэгулятарамі?

- У мяне ў кватэры стаяць старыя савецкія батарэі. Думаю, што яны стаяць у многіх, хто жыве не ў новабудоўлях. Ці можна іх памяняць?

- А ці трэба іх мяняць? На мой погляд, чыгунныя батарэі па сваіх тэхнічных характарыстыках не саступаюць сучасным. Але пры гэтым ніхто не забараняе мяняць батарэі. Замена ацяпляльных прыбораў – гэта перабудова жылога памяшкання. І для гэтага трэба і ўзгадненне мясцовага выканкама, і праект. Таму што вашыя батарэі ўплываюць на працу ўсёй сістэмы ацяплення ў доме. Праектная арганізацыя разлічыць аб'ёмы і дасць рэкамендацыі, колькі секцый батарэй трэба паставіць і якога аб'ёму яны павінны быць. І мяняць батарэі лепш летам, пакуль адсутнічае ацяпленне ў доме.

- За мяжой ва ўсіх стаяць батарэі з рэгулятарамі. Ці ёсць сэнс ставіць іх у нас?

- Ад таго, што вы ўсталюеце сабе сістэму рэгулявання на батарэі, эканамічны эфект будзе невялікі, але вы зможаце ўсталёўваць тэмпературу паветра камфортную для сябе. Сэнсу ў такіх рэгулятарах пры вертыкальнай сістэме ацяплення, няма. Вось у новых дамах, дзе ёсць лічыльнікі цяпла на кватэру, такія тэрмарэгулятары ставяць. Але, як паказвае практыка, эксплуатацыя і ўтрыманне сістэмы дарагая і эфект ад эканоміі пакуль незаўважны.

- Але можна, напрыклад, паехаць на месяц і паставіць батарэі на мінімум – відавочна будзе выгадна.

- Памяшканне не астывае за кошт цеплаперадачы ад суседзяў. І калі вы ставіце рэгулятар на мінімум і едзеце, вашы суседзі павялічваюць падачу цяпла. У чым эканомія?

БУДЗЬ У КУРСЕ!

Што рабіць, калі ў кватэры занадта холадна ці занадта горача?

Калі вы мерзнеце ў кватэры, то для пачатку пераканайцеся, што ў вас менш 18 градусаў цяпла – проста замерце тэмпературу. Калі адчуванні пацвярджаюцца тэрмометрам, тэлефануйце ў ЖЭС. Супрацоўнікі таксама замераюць тэмпературу і абавязаны ліквідаваць прычыны.

Калі ж у кватэры занадта горача, гэта нашмат горш, - кажа Андрэй Валер'евіч. – Гэта злачынства, якое неабходна спыняць. І калі ў кватэры вышэй 25 градусаў цяпла, трэба паведаміць не толькі ў ЖЭС, але і ў ЖРЭА, адміністрацыю раёна і Дэпартамент па энергаэфектыўнасці. Гэта нерацыянальнае выкарыстанне паліўна-энергетычных рэсурсаў.

ДАРЭЧЫ

Дарагія чытачы! Калі ў вас ёсць пытанні да спецыялістаў жыллёва-камунальнай гаспадаркі, дасылайце іх на адрас dom@phkp.by.

 

 

Студзень 2022
Пн Аў Ср Чц Пт Сб Нд
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
Яндекс.Метрика